ស្នងការនគរបាល ខេត្តបន្ទាយមានជ័យ ដឹកនាំកម្លាំង ចុះបង្ក្រាបករណីចាប់ជំរិតទារប្រាក់ នៅសណ្ឋាគារ ស៊ី ធី ប៉ោយប៉ែត
ខេត្តបន្ទាយមានជ័យ:ក្រោយពីបានទទួលព័ត៌មានពីនាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ នៃក្រសួងមហាផ្ទៃ ថា មានករណីចាប់ជំរិតទារប្រាក់ ពីភ្នំពេញ មកដល់ខេត្តបន្ទាយមានជ័យនោះ កម្លាំងនគរបាលខេត្តបន្ទាយមានជ័យ ក្រោមការដឹកនាំបញ្ជាផ្ទាល់ពី លោកឧត្តមសេនីយ៍ទោ អាត់ ខែម ស្នងការដ្ឋាននគរបាលខេត្តបន្ទាយមានជ័យ ដោយមានការ សម្របសម្រួលពី លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូង ខេត្តបន្ទាយមានជ័យ លោកឧត្តមសេនីយ៍ត្រី សិទ្ធិ ឡោះ ស្នងការរងទទួលបន្ទុកផែនព្រហ្មទណ្ឌនៃស្នងការនគរបាលខេត្តបន្ទាយមានជ័យ បានចុះប្រតិបត្តិការណ៍បង្ក្រាបករណីចាប់ជំរិតទារប្រាក់នៅសណ្ឋាគារ ស៊ី ធី ប៉ោយប៉ែត ដោយឃាត់ខ្លួនជនល្មើស បានចំនួន០៣នាក់ និងជួយសង្គ្រោះជនរងគ្រោះបាន០១នាក់។
ការចុះប្រតិបត្តិការបង្ក្រាបនេះបានធ្វើឡើងនៅថ្ងៃ ចន្ទ័ ១៥កើត ខែ ជេស្ឌឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៧ ខែមិថុនា ឆ្នាំ២០១៩ វេលាម៉ោង២៣និង៣០នាទី នៅចំណុច សណ្ឋាគារ ស៊ីធីប៉ោយប៉ែត ស្ថិតនៅសង្កាត់/ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានឲ្យដឹងថា ជនរងគ្រោះមានឈ្មោះ ថៅ ណាក់ អាយុ៣៧ឆ្នាំ មានទីលំនៅបច្ចុប្បន្នភូមិបឹងទំពុន សង្កាត់បឹងទំពុន ខណ្ឌ័មានជ័យ ក្រុងភ្នំពេញ។
ដោយឡែកជនល្មើសទាំង០៣នាក់រួមមាន:
១-ឈ្មោះ ព្រាប វណ្ណា ភេទប្រុស អាយុ២៣ឆ្នាំ ជាអ្នកបើកបរ។
២-ឈ្មោះ ព្រាប វណ្ណះ ភេទប្រុស អា២៩ឆ្នាំ ជាអ្នកចាប់។
៣-ឈ្មោះ វ៉ាន់ ស្រេត ភេទប្រុស អាយុ២៨ឆ្នាំ ជាសមគំនិត។
ក្រោយពីឃាត់ខ្លួន សមត្ថកិច្ចបានរកឃើញនូវវត្ថុតាមួយចំនួនរួមមាន:ឡានម៉ាកលុចសីស៣០០មួយគ្រឿងពណ៌កាំម៉ៃ មានស្លាកលេខភ្នំពេញ 2AL-8004 ជាមធ្យោបាយ។
បច្ចុប្បន្នជនល្មើសទាំង០៣នាក់ រួមនឹងវត្ថុតាងទាំងអស់ត្រូវបានប្រគល់ជូនទៅនាយកដ្ឋាននគរបាលព្រហ្មទណ្ឌ នៃអគ្គស្នងការនគរបាលជាតិ នៃក្រសួងមហាផ្ទៃ ដើម្បីចាត់ការបន្តទៅ តាមនិតិវិធីនៃច្បាប់ បន្ទាប់ពីជំនាញធ្វើការសាកសួររួចរាល់ហើយនោះ៕
