ឆ្លងផ្លូវខ្វះការប្រុងប្រយត្ន័ ត្រូវម៉ូតូសិស្សសាលា បុកបណ្តាលឲ្យរបួសធ្ងន់
ខេត្តកំពត៖បុរសចំណាស់ម្នាក់បានរងរបួសយ៉ាងដំណំ ក្នុងករណីគ្រោះថ្នាក់ចរាចរណ៍ ដោយសារម៉ូតូសិស្សសាលាបុកពេញទំហឹង ខណៈពេលជនរងគ្រោះដើរឆ្លងផ្លូវមិនប្រយ័ត្ន។
ហេតុការណ៍នេះបានកើតឡើងកាលពីវេលាម៉ោង១៧ និង១០នាទីល្ងាច ថ្ងៃទី១៣ ខែមិថុនា ឆ្នាំ២០១៩ ត្រង់ចំណុចមុខ KTVហេបភីដាលីង ស្ថិតក្នុងភូមិភ្នំសាឡី ឃុំកំពង់ត្រាចខាងលិច ស្រុកកំពង់ត្រាច ខេត្តកំពត លើកំណាត់ផ្លូវជាតិលេខ៣៣។
តាមប្រភពព័ត៌មាននៅកន្លែងកើតហេតុបាននិយាយថា មុនពេលកើតហេតុគេឃើញបុរសចំណាស់ម្នាក់ដើរឆ្លងផ្លូវពីផ្នែកខាងត្បូងទៅផ្នែកខាងជើងលុះកំពុងរៀបឆ្លងផ្លូវក៏មានម៉ូតូមួយគ្រឿងមាកC125 ធ្វើដំណើរមកពីកើតទៅលិច ពេលមកដល់ចំណុចកើតហេតុក៏វាក់អ៊ើជាមួយជនរងគ្រោះ ហើយគេចមិនទាន់ទើបបុកបុរសចំណាស់ពេញទំហឹង បណ្តាលឲ្យរងរបួសទាំងអស់គ្នាតែម្តង។
ទាក់ទិននឹងគ្រោះថ្នាក់ខាងលើ សមត្ថកិច្ចមូលដ្ឋានបានរៀបរាប់ថា គ្រោះថ្នាក់បែបនេះផ្តើមឡើងដោយសារជនរងគ្រោះឆ្លងផ្លូវមិនប្រយ័ត្ន មិនមើលមុខមើលក្រោយ ទើបធ្វើឲ្យអ្នកបើកបរម៉ូតូគេចមិនរួចក៏ជ្រុលបុកមួយទំហឹងរងគ្រោះទាំងអស់គ្នាតែម្តង។
សមត្ថកិច្ចបានបញ្ជាក់ថា ជនរងគ្រោះឈ្មោះ ឡុង ស៊ុំ ភេទប្រុស អាយុ៦៦ឆ្នាំ របួសធ្ងន់ មានទីលំនៅភូមិភ្នំសាឡី ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
ដោយឡែកភាគីខាងម៉ូតូជិះគ្នាពីរនាក់ អ្នកបើកបរឈ្មោះ ជុំ សែ ភេទប្រុស អាយុ១៨ឆ្នាំ របួសមធ្យម ជាសិស្សសាលាចិនគាកឃួន និងអ្នករួមដំណើរឈ្មោះ លៀន រាជសី ភេទប្រុស អាយុ១៤ឆ្នាំ របួសស្រាល សិស្សសាលាចិនគាកឃួនដូចគ្នា ទាំងពីរនាក់រស់នៅភូមិបាយទា ឃុំស្វាយទងខាងជើង ស្រុកកំពង់ត្រាច ខេត្តកំពត ជិះម៉ូតូម៉ាកC125 ពណ៌ខ្មៅ ពាក់ស្លាកលេខ កំពត 1D-5659។
បច្ចុប្បន្នបុរសចំណាស់រងគ្រោះ និងសិស្សសាលារងរបួស ត្រូវបានក្រុមគ្រួសារដឹកទៅសង្គ្រោះនៅឯមន្ទីរពេទ្យរៀងៗខ្លួន៕
