អាវុធហត្ថ ក្រុងប៉ោយប៉ែត ចាប់ឃាត់ខ្លួនជនសង្ស័យម្នាក់ ពាក់ព័ន្ធករណីជួញដូរគ្រឿងញៀន
ខេត្តបន្ទាយមានជ័យះលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុងប៉ោយប៉ែត បានដឹកនាំកំលាំងអាវុធហត្ថ១ក្រុម ចុះបង្រ្កាបករណីជួញដូរគ្រឿងញៀន ដោយឃាត់ខ្លួនជនសង្ស័យបានចំនួន១នាក់ រួមនឹងវត្ថុតាងមួយចំនួន។
ការចុះប្រតិបត្តិការបង្ក្រាបនេះបានធ្វើឡើងនៅវេលាម៉ោង៦ល្ងាច ថ្ងៃទី២៨ ខែឧសភា ឆ្នាំ២០១៩ នៅចំណុចមុខកាស៊ីណូផ្កាយប្រាំ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ជនសង្ស័យដែលត្រូវបានកម្លាំងកងរាជអាវុធហត្ថចាប់ខ្លួននោះ មានឈ្មោះ សូរ សូត្រ ហៅ ដុំ ភេទប្រុស អាយុ៤៦ឆ្នាំ មុខរបរ រត់ម៉ូតូឌុប រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
ក្រោយឃាត់ខ្លួនសមត្ថកិច្ចដកហូតបាននូវវត្ថុតាងរួមមានគ្រឿងញៀនមេតំហ្វេតាមីន ទឹកកក ចំនួន ៤កូនថង់តូច និង១ថង់ធំ ស្មើ ៧៥.៤ក្រាម គ្រឿងញៀនមេតំហ្វេតាមីនគ្រាប់ ចំនួន ៧គ្រាប់ ស្មើ ០.៩៥ក្រាម ម៉ូតូចំនួន ១គ្រឿង ទូរស័ព្ទដៃចំនួន២គ្រឿង កាបូបលុយចំនួន ១ និងប្រាក់បាតថៃ ចំនួន ៦០០បាត ជនសង្ស័យក្រោយពីឃាត់ខ្លួនហើយបានបញ្ជូនកមទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលការងារប្រយុទ្ធប្រឆាំងគ្រឿងញៀន បានប្រាប់អ្នកយកព៍ត័មានឲ្យដឹងថា ដោយមានបទបញ្ជាពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកបានធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានលួចលក់គ្រឿងញៀនពិតប្រាកដមែន។
ដោយផ្អែកលើចម្លើយសារភាពរបស់ជនសង្ស័យនិងយោងលើវត្ថុតាង ជនសង្ស័យអាចត្រូវចោទពីបទលួចលក់គ្រឿងញៀន ខុសច្បាប់ កម្លាំងជំនាញបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមច្បាប់៕
