រថយន្តដឹកសាប៊ូបែកកង់ រួចជ្រុលទៅបុករថយន្តមួយគ្រឿងទៀត បណ្តាលឲ្យមនុស្សចំនួន៤នាក់បានស្លាប់
ខេត្តកោះកុង៖យ៉ាងហោចមនុស្សចំនួន៤នាក់បានស្លាប់បាត់បង់ជីវិត ក្នុងហេតុការណ៍គ្រោះថ្នាក់ចរាចរណ៍បង្កឡើងដោយរថយន្តដឹកសាប៊ូបែកកង់ ជ្រុលទៅបុករថយន្ត១គ្រឿងទៀត។
ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោងជាង២រសៀល ថ្ងៃទី០២ ខែធ្នូរ ឆ្នាំ២០១៩ នៅលើផ្លូវជាតិលេខ៤៨ ចន្លោះបង្គោលគីឡូម៉ែត្រលេខ ៤៦-៤៧ ស្ថិតនៅក្នុងភូមិប្រលាន ឃុំកណ្តោល ស្រុកបូទុមសាគរ ខេត្តកោះកុង។
បើតាមសមត្ថកិច្ចបានឲ្យដឹងថា៖ជនរងគ្រោះដែលបានស្លាប់បាត់បង់ជីវិត ក្នុងហេតុការណ៍គ្រោះថ្នាក់ចរាចរណ៍នោះរួមមាន៖
ទី១-ឈ្មោះ សូ សំនាង ភេទ ប្រុស អាយុ២៥ ឆ្នាំ ជនជាតិខ្មែរ មានទីលំនៅស្រុកកោះធំ ខេត្តកណ្តាល ( ស្លាប់ )។
ទី២-ឈ្មោះ វីរះ ភេទប្រុស អាយុ៣៤ឆ្នាំ ជនជាតិខ្មែរ មានទីលំនៅខេត្តស្វាយរៀង (ស្លាប់)។
ទី៣-ឈ្មោះ ស៊ាង គ្រី ភេទប្រុស អាយុ៣០ឆ្នាំ ជនជាតិខ្មែរ មានទីលំនៅខេត្តកំពង់ចាម (ស្លាប់)។
ទី៤-ឈ្មោះ ប៊ូ ប៊ុនថន ភេទប្រុស អាយុ៣០ឆ្នាំ ជនជាតិខ្មែរ មានទីលំនៅស្រុកស៊ីធរកណ្តាល ខេត្តព្រៃវែង(ស្លាប់)។ចំណែកអ្នកបើកបររថយន្ត HYUNDAI និងអ្នករួមដំណើរ ពុំស្គាល់អត្តសញ្ញាណ ក្រោយពីកើតហេតុបានរត់គេចខ្លួនបាត់។
សមត្ថកិច្ចបន្តថា៖ករណីខាងលើនេះបង្កឡើងដោយរថយន្តFRONTIAកង់៦មួយតោនកន្លះ ពណ៌ ស ពាក់ស្លាកលេខ ភ្នំពេញ 2AT6439 ដឹកសាប៊ូរ បើកបរទិសដៅពីផ្សារវាលរេញ មកកោះកុង រួចក៏បែកកង់ខាងមុខខាងឆ្វេង រ៉េចង្កូតចូលផ្លូវនៃរថយន្ត១គ្រឿងទៀតម៉ាកHYUNDAI ពណ៌ ស ពាក់ស្លាកលេខ ព្រះសីហនុ 3A 4000 ទិសដៅផ្ទុយគ្នា បុកចំពីរមុខយ៉ាងពេញទំហឹង បណ្តាលឲ្យស្លាប់ចំនួន០៤នាក់។
ក្រោយពីសមត្ថកិច្ចធ្វើការវាស់វែងនិងធ្វើកោសល្យវិច្ច័យរួចសពជនរងគ្រោះ បានយកទៅតំកល់ទុកនៅវត្តអណ្តូងទឹក រងចាំគ្រួសារសពមកទទួល ចំណែកឯរថយន្តទាំងពីរគ្រឿងខាងលើ រងការខូចខាតធ្ងន់ នាំយកមករក្សាទុកនៅអធិការដ្ឋាននគរបាលដើម្បីដោះស្រាយគ្នាជាក្រោយ៕
