រថយន្តម៉ាកហ្វ្រីលែនណែ បុកជាមួយរថយន្តនីសាន់ឌីស៊ែល ប្រភេទបែនដឹកដី សំណាងល្អមិនមានអ្នកគ្រោះថ្នាក់
ខេត្តកំពង់ស្ពឺ៖ឧបទ្ទវហេតុគ្រោះថ្នាក់ចរាចរណ៍បង្កឡើងដោយរថយន្តម៉ាក ហ្វ្រីលែនណែ បានបុកជាមួយរថយន្តមួយគ្រឿងម៉ាក នីសាន់ ឌីស៊ែល ប្រភេទបែនដឹកដី បណ្តាលឲ្យរថយន្តម៉ាក ហ្វ្រីលែនណែក្រឡាប់នៅលើទ្រូងផ្លូវ រងការខូចខាតធ្ងន់។
ហេតុការណ៍នេះបានកើតឡើងកាលពីវេលាម៉ោង០៩ព្រឹក ថៃ្ងទី២៧ ខែធ្នូ ឆ្នាំ២០១៩ នៅលើផ្លូវជាតិលេខ៤ ចន្លោះគីឡូម៉ែត្រលេខ៨២-៨៣ ត្រង់ចំណុចភូមិទីមួយ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
បើតាមប្រភព័ត៌មានបានឲ្យដឹងថា៖ករណីខាងលើនេះបង្កឡើងដោយរថយន្តម៉ាក ហ្វ្រីលែនណែ ពណ៌បៃតងចាស់ ពាក់ស្លាកលេខ ព្រះសីហនុ 3A-2565 សឺមីសណ្តោងរ៉ឺម៉កលេខ ព្រះសីហនុ 4A-0996 អ្នកបើកបរឈ្មោះឈូក ស្រាយ ភេទប្រុស អាយុ២៩ឆ្នាំ រស់នៅភូមិកោះក្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត បើកបរក្នុងទិសដៅពីលិចទៅកើត លុះមកដល់ចំណុចខាងលើ បានបុកជាមួយរថយន្ត១គ្រឿងម៉ាក នីសាន់ ឌីស៊ែល ប្រភេទបែនដឹកដី គ្មានស្លាកលេខ ពណ័ខៀវ អ្នកបើកបរ ឈ្មោះ ខា ភេទប្រុស អាយុ ៣០ឆ្នាំ រស់នៅភូមិស្គុះ ឃុំស្គុះ ស្រុកសំរោងទង ខេត្តកំពង់ស្ពឺ។
គ្រោះថ្នាក់ចរាចរណ៍ខាងលើបណ្តាលឲ្យរថយន្តម៉ាក ហ្វ្រីលែនណែក្រឡាប់នៅលើទ្រូងផ្លូវ រងការខូចខាតធ្ងន់ ដាច់ទូកុងទែន័រមកលើថ្នល់ជាតិ ចំណែករថយន្តម៉ាកនីសាន់ ដឹកដី រងការខូចខាតស្រាល ក្រោយពីបុករួចអ្នកបើកបររថយន្តម៉ាកនីសាន់ បានរត់គេចខ្លួនបាត់។
បើតាមលោកវរសេនីយ៍ទោ ពៅ នឿន អធិការរង ជំនាញចរាចរណ៍បានឲ្យដឹងថា គ្រោះ ថ្នាក់ចរាចរណ៍ខាងលើមិនបណ្ដាលឲ្យគ្រោះថ្នាក់ដល់អាយុជីវិតមនុស្សទេ ក្រោយមកកម្លាំងនគរបាលចរាចរណ៍បានសម្របសម្រួលចរាចរណ៍ និងគត់កំណត់ហេតុដើម្បីដោះស្រាយគ្នាជាក្រោយ៕