បុរសម្នាក់រងរបួសធ្ងន់ ដោយសាររថយន្ត របស់ជនជាតិតៃវ៉ាន់ បុកម៉ូតូ នៅលើកំណាត់ផ្លូវជាតិលេខ៣
ខេត្តកំពត៖បុរសម្នាក់បាររងរបួសយ៉ាងដំណំ ដោយសារជួបហេតុការណ៍គ្រោះថ្នាក់ចរាចររថយន្តបុកម៉ូតូ នៅលើកំណាត់ផ្លូវជាតិលេខ៣ កំពត-វាលរេញ ក្នុងទិសដៅស្របគ្នា។
ហេតុការណ៍នេះបានកើតឡើង នៅវេលាម៉ោង១៣និង៣០នាទីរសៀល ថ្ងៃទី២៩ ខែតុលា ឆ្នាំ២០១៩ ចន្លោះគីឡូម៉ែត្រ(១៥០-១៥១) ត្រង់ចំណុចផ្លូវបំបែកចូលអាហារដ្ឋានអូរដឹម ស្ថិតក្និងភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ខេត្តកំពត។
ទាក់ទិននឹងករណីគ្រោះថ្នាក់ចរាចរខាងលើ សមត្ថកិច្ចមូលដ្ឋានបាននិយាយថា មុនដំបូងមានរថយន្តមួយគ្រឿងម៉ាកCRVពណ៌សំបកឪឡឹកពាក់ស្លាកលេខភ្នំពេញ 2C-7084 បើកដោយឈ្មោះSU CHANG KENG ភេទប្រុស ឆ្នាំកំណើត 02/08/1959 ជនជាតិតៃវ៉ាន់ស្នាក់នៅភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត បើកបរក្នុងទិសដៅពីត្បូងទៅជើង លុះទៅដល់ត្រង់ចំណុចខាងលើបានបត់ឆ្វេងក៏បានប៉ះជាមួយម៉ូតូមួយគ្រឿងម៉ាកហុងដាសេ១២៥ពណ៌ខ្មៅ ពាក់ស្លាកលេខ ភ្នំពេញ1BE-6584 បើកបរដោយឈ្មោះ ខុន គា ភេទប្រុស អាយុ២៦ឆ្នាំ រស់នៅភូមិត្រពាំងរពៅ ឃុំព្រែកត្នោត ស្រុកទឹកឈូ ខេត្តកំពត ជនរងគ្រោះបើកបរក្នុងទិសដៅពីត្បូងទៅជើងបណ្តាលឲ្យរងរបួសធ្ងន់ធ្ងរ។
បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តកំពត។ចំណែកវត្ថុតាងសមត្ថកិច្ចបានយកមករក្សាទុកនៅអធិការដ្ឋាននគរបាលក្រុងកំពត៕
