របួសធ្ងន់ស្រាល២នាក់ ដោយសារឧបទ្ទវហេតុគ្រោះថ្នាក់ចរាចរណ៍ រវាងម៉ូតូបុកគ្នានៅស្រុកឈូក
ខេត្តកំពត៖ឧបទ្ទវហេតុគ្រោះថ្នាក់ចរាចរណ៍បង្កឡើងរវាងម៉ូតូនិងម៉ូតូ បណ្តាលឲ្យអ្នកបើកបរទាំងសងខាងរងរបួសដូចគ្នា។នេះបើយោងតាមប្រភពព័តមានពីសមត្ថកិច្ច នៃអធិការដ្ឋាននគរបាលស្រុកឈូក។
សមត្ថកិច្ចបន្តថា៖ករណីនេះបានកើតឡើងកាលពីវេលាម៉ោង១០និង០៥នាទីព្រឹក ថ្ងៃទី២៩ ខែតុលា ឆ្នាំ២០១៩ ដោយជិះបញ្ច្រាស់ទិសគ្នា ពីជើងទៅត្បូងលើផ្លូវឈូក ជុំគិរី ចន្លោះបង្គោលគីឡូម៉ែត្រលេខ១.២ ស្ថិតក្នុងភូមិឈើទាល ឃុំឈូក ស្រុកឈូក ខេត្តកំពត។
ប្រភពដដែលបានបញ្ជាក់ទៀតថា ហេតុការណ៍នេះមុនដំបូងមានម៉ូតូម៉ាកសេ១២៥ ពណ៌ខ្មៅ ឆ្នាំ២០១៩ ពាក់ស្លាកលេខ កំពត 1O-1086 អ្នកបើកបរដោយឈ្មោះ វ៉ាន់ ឡូ ភេទប្រុស អាយុ១៨ឆ្នាំ មានទីលំនៅភូមិក្រហូង ឃុំឈូក ស្រុកឈូក ខេត្តកំពត ហើយអ្នកបើកបរនេះមិនពាក់មួកសុវត្ថិភាព មិនដាក់កញ្ចក់មើលក្រោយ បានបើកបរមកពីទិសខាងជើងពេលមកដល់ចំណុចកើតហេតុខាងលើ បានវ៉ាម៉ូតូមួយគ្រឿងដែលបើកបរស្របទិសគ្នា ទើបជ្រុលទៅបុកម៉ូតូម៉ាក សេ ១២៥ ពណ៌ខ្មៅ ពាក់ស្លាកលេខ ភ្នំពេញ 1FX-9942 ដែលបើកមកពីទិសខាងត្បូង បើកបរដោយឈ្មោះ ញឹម ស្រី ភេទស្រី អាយុ៤៧ឆ្នាំមានទីលំនៅភូមិសុភី ឃុំស្រែជាខាងជើង ស្រុកដងទង់ ខេត្តកំពត បណ្ដាលឲ្យរងរបួសបាក់កជើងខាងឆ្វេងនិងម៉ូតូខូចខាតធ្ងន់ធ្ងរ។
បច្ចុប្បន្នអ្នករងរបួសត្រូវបានដឹកទៅសង្គ្រោះនៅឯមន្ទីរពេទ្យ។ចំណែកមធ្យោបាយពាក់ព័ន្ទ សមត្ថកិច្ចបានយកទៅរក្សាទុកនៅក្នុងអធិការដ្ឋាននគរបាលស្រុកឈូក ដើម្បីធ្វើការដោះស្រាយគ្នាជាក្រោយ៕