ទំនិញហួសកាលបរិច្ឆេទ ចំនួន៤មុខ ដែលមន្ត្រីសាខាកាំកុងត្រូលខេត្តព្រះវិហារ រកឃើញនៅតាមផ្ទះលក់ទំនិញនានា យកទៅដុតកម្ទេចចោល
ខេត្តព្រះវិហារ៖មន្ត្រីសាខាកាំកុងត្រូលខេត្តព្រះវិហារ ដឹកនាំដោយលោក ដួង មុនី ប្រធានសាខា បានសហការជាមួយមន្រ្តីមន្ទីរពាណិជ្ជកម្ម និងអាជ្ញាធរមូលដ្ឋាន នៅថ្ងៃទី១៧ ខែតុលា ឆ្នាំ២០១៩បានចុះត្រួតពិនិត្យគុណភាព ទំនិញវេចខ្ចប់ស្រេច តាមផ្ទះលក់ទំនិញនានា ក្នុងភូមិគូលេនត្បូង ឃុំគូលេនត្បូង ស្រុកគូលេន ខេត្តព្រះវិហារ ដោយរកឃើញផលិតផលខូចគុណភាពចំនួន៤មុខ យកទៅដុតកម្ទេចចោល។
លោកប្រធានសាខាកាំកុងត្រូលខេត្តព្រះវិហារ បានឲ្យដឹងថា នៅក្នុងប្រតិបត្តិការចុះត្រួតពិនិត្យនេះ ទំនិញតាមផ្ទះលក់ទំនិញនានា ក្នុងភូមិគូលេនត្បូង ឃុំគូលេនត្បូង ខាងលើនេះ ក្រុមការងាររបស់លោក បានរកឃើញទំនិញហួសកាលបរិច្ឆេទចំនួន៤មុខរួមមាន៖ទឹកត្រីចំនួន ០១ដប,ទឹកស៊ីអ៊ីវ ចំនួន០៦ដប,ទឹកក្រូចចំនួន០៧ដបនិងប្រេងឆាចំនួន១០ដប ហើយក្រុមការងារបានធ្វើកំណត់ហេតុដកហូតយកទៅទុកដុតកំទេចចោល។
លោក ដួង មុនី ក៏បានអំពាវនាវដល់ប្រជាពលរដ្ឋ ក៏ដូចជា អាជីវករអ្នកលក់ដូរ ទាំងអស់ត្រូវមានការប្រុងប្រយ័ត្ន និងយកចិត្តទុកដាក់ ចំពោះកាចរាចរ ចែកចាយលក់ដូរ និងទិញទំនិញម្ហូបអាហារ ទទួលទាន៕
