ស្នងការរងនគរបាល ខេត្តព្រះសីហនុ បង្ហាញមុខក្រុមចោប្លន់ ចំនួន០៤នាក់
ខេត្តព្រះសីហនុ៖បន្ទាប់ពីធ្វើការស្រាវជ្រាវយ៉ាងយកចិត្តទុកដាក់ ដោយមានការចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដោយប្រើប្រាស់ជំនាញចូលជ្រៅទើបនៅថ្ងៃទី១៣ ខែតុលា ឆ្នាំ២០១៩ វេលាម៉ោង០២រំលងអធ្រាត្រកម្លាំងជំនាញផែននគរបាលព្រហ្មទណ្ឌ បានចាប់ខ្លួនបានជនសង្ស័យចំនួន០២នាក់នៅចំណុចម្តុំឧតុនិយមស្ថិតនៅភូមិ៣ សង្កាត់លេខ៣ ក្រុង.ខេត្តព្រះសីហនុ ហើយជនសង្ស័យទាំង០២នាក់នេះ គឺជាមុខសញ្ញាធ្វើសកម្មភាពវាយប្លន់យកលុយជនជាតិចិន ដូចគ្នាកាលពីថ្ងៃទី០៩ ខែតុលា ឆ្នាំ២០១៩ វេលាម៉ោង១១នៅតាមផ្លូវអង្គការម្លប់តាប៉ាង ស្ថិតក្នុងភូមិ៣ សង្កាត់លេខ៤ ក្រុង.ខេត្តព្រះសីហនុ នៅព្រឹកថ្ងៃទី១៦ ខែតុលា ឆ្នាំ២០១៩ លោកឧត្តមសេនីយ៍ត្រី កុល ផាលី ស្នងការរងនគរបាលខេត្តព្រះសីហនុ បានធ្វើការបង្ហាញមុខ។
ជនរងគ្រោះមានឈ្មោះliu chuan ភេទប្រុស អាយុ៣០ឆ្នាំ ជាជនជាតិចិន មុខរបរកម្មករសំណង់មានទីលំនៅ លក់ដូរ កាន់លិខិតឆ្លងដែនលេខៈE 04 27 43 47 បាត់បង់សម្ភារៈលុយចំនួន១៧០០ដុល្លារអាមេរិច និងទូរស័ព្ទដៃមួយគ្រឿងម៉ាក iphone។
ចំណែកជនសង្ស័យទាំង០២នាក់ទី១.Zhou wen ភេទប្រុស អាយុ២៥ឆ្នាំជនជាតិចិនមុខរបរមិនពិតប្រាកដមានទីលំនៅភូមិ៤ សង្កាត់លេខ៤ ក្រុង.ខេត្តព្រះសីហនុ លិខិតឆ្លងដែន (គ្មាន) និងទី២.ឈ្មោះTan Bei ភេទប្រុសអាយុ២៩ឆ្នាំជនជាតិចិនមុខរបរមិនពិតប្រាកដ មានទីលំនៅភូមិ២ សង្កាត់លេខ២ ក្រុង.ខេត្តព្រះសីហនុ លិខិតឆ្លងដែន(គ្មាន)។
លោកឧត្តមសេនីយ៍ត្រី កុល ផាលី ស្នងការរងបញ្ជាក់ថា បន្ទាប់ពីធ្វើការសាកសួរជនសង្ស័យទាំង០២នាក់បានសារភាពថា កាលពីថ្ងៃ ទី០៩ ខែតុលា ឆ្នាំ២០១៩ វេលាម៉ោង១១ ពួកគេពិតជាបានធ្វើសកម្មភាពវាយប្លន់យកលុយជនជាតិចិនដូចគ្នានៅតាមផ្លូវអង្គការម្លប់តាប៉ាង ស្ថិតនៅក្នុងភូមិ៣ សង្កាត់លេខ៤ ក្រុង.ខេត្តព្រះសីហនុពិតប្រាកដមែន ហើយពួកវានៅមានបក្ខពួកចំនួន០២នាក់ទៀតដែលបានប្រព្រឹត្តបទល្មើសចោរកម្ម(លួចម៉ូតូដោយកាច់បំបែកសោ)។
បន្ទាប់ពីធ្វើការសាកសួររួចហើយកម្លាំងជំនាញផែននគរបាលព្រហ្មទណ្ឌ បានបន្តការស្រាវជ្រាវតាមចាប់ខ្លួនបក្ខពួករបស់ជនសង្ស័យបានចំនួន០២នាក់បន្ថែមទៀត ថែមទាំងដកហូតសម្ភារៈ វត្ថុតាងជាច្រើនដែលជាឧបករណ៍សម្រួលក្នុងការប្រព្រឹត្តបទល្មើសចោរកម្មទៀតផង។ ជនសង្ស័យទាំង០២នាក់ទី១.Lin Wei ភេទប្រុស អាយុ២៩ឆ្នាំជនជាតិចិន មុខរបរមិនពិតប្រាកដ មានទីលំនៅភូមិ៥ សង្កាត់លេខ ៤ ក្រុង.ខេត្តព្រះសីហនុលិខិតឆ្លងដែន(គ្មាន) និងទី២.Li HongLiang ភេទប្រុស អាយុ៤២ឆ្នាំ ជនជាតិចិន មុខរបរមិនពិតប្រាកដ មានទីលំនៅភូមិ៤ សង្កាត់លេខ៤ ក្រុង.ខេត្តព្រះសីហនុ លិខិតឆ្លងដែន(គ្មាន)និងចាប់បាននូវវត្ថុតាងជាច្រើនទៀត។
បច្ចុប្បន្នកម្លាំងជំនាញការិយាល័យនគរបាលព្រហ្មទណ្ឌកំរិតស្រាល កំពុងបន្តនីតិវិធីបញ្ជូនទៅសាលាដំបូងខេត្តព្រះសីហនុ ដើម្បីចាត់ការតាមនីតិវិធី៕
