ឧបទ្ទវហេតុគ្រោះថ្នាក់ចរាចណ៍ រវាងរថយន្ត២គ្រឿង និងមូតូ២គ្រឿង បណ្តាលឲ្យមនុស្សចំនួន៧នាក់របួសធ្ងន់
ខេត្តកំពង់ចាម៖រថយន្ដម៉ាកនីសាន់០១គ្រឿង បុករថយន្ដម៉ាកសាំយ៉ុង០១គ្រឿងទៀត រួចជ្រុលទៅបុកម៉ូតូពីរគ្រឿងផ្សេងទៀត បណ្តាលឲ្យមនុស្សប្រុស ស្រីចំនួន៧នាក់រងរបួសជាទម្ងន់។
ករណីនេះបានកើតឡើងកាលពីថ្ងៃទី០១ ខែតុលា ឆ្នាំ២០១៩ នៅលើផ្លូវជាតិលេខ៦ ចំណុចខាងជើងស្ពានត្រោះ ស្ថិតនៅភូមិបាធាយ ឃុំបាធាយ ស្រុកបាធាយ ខេត្តកំពង់ចាម។
បើតាមប្រភពព័ត៌មានបានឲ្យដឹងថា៖នៅមុនពេលកើតហេតុគេបានឃើញរថយន្ដ០១គ្រឿង ម៉ាកនីសាន់ ពាក់ស្លាកលេខ ភ្នំពេញ 2AH 9289 បើកបរដោយឈ្មោះយ៉ន យីន ភេទប្រុស អាយុ៤៤ឆ្នាំ មានទីលំនៅ ខេត្តសៀមរាប បើកបរក្នុងមានទិសដៅពីត្បូងទៅជើង លុះដល់ចំណុចខាងលើបានបែកកង់មុខខាងឆ្វេង ក៏ជ្រុលចង្កូតឡើងសួនច្បារ ហួសទៅបុករថយន្ដ០១គ្រឿងទៀត ម៉ាកសាំយ៉ុង ពណ៍ទឹកប្រាក់ ពាក់ស្លាកលេខភ្នំពេញ 2H 2154 បើកបរដោយឈ្មោះសុះ អ៊ែល ភេទប្រុស អាយុ៤៥ នៅខេត្តស្ទឹងត្រែង ហើយក៏ជ្រុលទៅបុកម៉ូតូពីរគ្រឿងទៀត ដែលមកពីទិសខាងជើងទៅត្បូង ស្របជាមួយរថយន្ដសាំយ៉ុង បណ្តាលឲ្យអ្នកជិះក្នុងរថយន្ដសាំយ៉ុងចំនួន០៤នាក់រងរបួសស្រាល០២នាក់ ធ្ងន់០២នាក់ អ្នកជិះម៉ូតូចំនួន០៣នាក់រងរបួសធ្ងន់០២នាក់ ស្រាល០១នាក់) ចំណែកមធ្យោបាយរងការខូចខាតទាំងសងខាង។
ក្រោយកើតហេតុសមត្ថកិច្ចបានឃាត់ខ្លួនអ្នកបើកបររថយន្តម៉ាកនីសាន់ ដើម្បីដោះស្រាយតាមនិតិវិធី។ដោយឡែកអ្នករងគ្រោះត្រូវបានបញ្ជូនទៅកាន់មន្ទីពេទ្យ ដើម្បីជួយសង្គ្រោះ៕